Ала качуунун курмандыгы болгон Бурулайды эскерүү иретинде Sputnik Кыргызстан агенттиги анын акыркы жолу түшкөн сүрөт, видеолорун топтоп материал даярдады (сүрөт, видеолору маркумдун туугандарынан алынды).
Турдалы Кожоналиев кызын өтө аракетчил, токтоо мүнөз болчу деп сыпаттайт. Кичинесинен дарыгер болууну кыялданган Бурулай окууга өз күчү менен өтүптүр.
"Кызым бирибизге да жүгүн арткан жок. Токтоо, бир мүнөз болчу. Медициналык колледжге тапшырган. Сабактан чыгып тигүү цехине барып иштечү. Колунан баары келчү эле. Окуусунун акчасын өзү төлөп, апасына телефон сатып берген", — деп жашыды Турдалы Кожоналиев.
Маркумдун эжеси Миргүл Турдалиева да анын аябай эмгекчил, күйүмдүү экенин кошумчалады.
Эске салсак, 27-майдын түнүндө 30 жаштагы киши Чүй облусуна караштуу Жайыл районунун ички иштер бөлүмүндө ала качып алган кызын бычактап, кийин өзүнө да кол салган. 20 жаштагы Бурулай Турдалы кызы алган жараатынан улам каза болуп, эркек киши ооруканага түшкөн.
20-июнь күнү шектүүнүн баш коргоо чарасы каралып, Бишкектеги №1 тергөө абагына киргизилген. Учурда тергөө иштери бүтө элек. Кыздын өлүмү боюнча бир эмес эки жолу соттук-медициналык экспертиза жүргүзүлүп, анын денесиндеги кескиленип жазылган жазууну эксперттер жокко чыгарып, ал жандандыруу учурунда колдонулган дефибриллятордун изи деп жыйынтык чыгарышкан.
Бирок Турдалы Кожоналиев Sputnik Кыргызстан агенттигине берген маегинде кызынын денесиндеги кескиленип жазылган жазууну өз көзү менен көргөнүн айтып, анын сүрөтүн кабарчыларга да көрсөткөн.
Бурулайдын иши боюнча сот качан болоору азырынча белгисиз, бирок жакында эле Турдалы Кожоналиев 28-майдагы Жайыл райондук милиция бөлүмүндөгү видеокамералардын файлдары өчүп калганын айткан.
Акыйкат издеген ата милиция кызматкерлеринин жоопкерчилигине тийиштүү деңгээлде баа берилбей жатканын, тергөөчүлөр алардын күнөөсүн жашырууга аракет кылып жатат дейт.
