Телефон аппараттарды каттаткандан кийин уурдоого мүмкүн болбой калат. Жарандар телефонун жоготуу көйгөйүнөн арылат. Бул тууралуу Эшмамбет Аматов Sputnik Кыргызстан радиосунун таңкы эфиринде маек куруп жатып билдирди.
Анын айтымында, сунушталып жаткан мыйзам долбоору контрабандалык жол менен кирген байланыш аппараттарына да бөгөт коет.
"Бул мыйзам башка чет мамлекеттердин тажрыйбасынан алынды. Учурда мыйзам долбоору өкмөттүн расмий сайтында коомдук талкууда турат. Мыйзам кабыл алынып калса өлкө үчүн да, жарандар үчүн да пайдалуу болот. Башкысы, кыргызстандыктар смартфондорун жоготпой калышат. Анткени, катталган телефонду уурдап кеткен күндө да, берилген атайын кодду өчүрсө, аппарат иштебей калат. Мындан сырткары өлкөгө сапаттуу байланыш аппараттары кире баштайт", — деди Аматов.
Ал жарандарды бул процедураларды түшүнүү менен кабыл алып, сунушталган мыйзам долбоорун талкуулоого активдүү катышуусун өтүндү.
