БИШКЕК, 24-июл. — Sputnik. Ички иштер министри Кашкар Жунушалиев Бишкекте өткөн маалымат жыйында Бурулайдын атасы Турдали Кожоналиев менен жолугушуу болгонун айтты.
Ага чейин эки күн мурда маркумдун атасы Sputnik Кыргызстан агенттигине келип, соттук-медициналык экспертизанын жыйынтыгына нааразы болгонун айтып, кыргыз элинен адилеттүүлүк менен күрөшүүгө жардам берүүнү суранган.
"Кыздын атасы менен, жактоочусу менен да жолугушуу болгон. Жолугушуудан соң комиссиялык соттук-медициналык экспертиза түзүлгөн, учурда алар ишин жыйынтыктап калды. Андан соң иш сотко өткөрүлөт. Калган жыйынтыкты сот чыгарат", —деди Жунушалиев.
Эске салсак, 28-майдын түнүндө 30 жаштагы киши Чүй облусуна караштуу Жайыл районунун Ички иштер бөлүмүндө ала качып алган кызын бычактап, кийин өзүнө да кол салган. Бурулай алган жараатынан улам каза болуп, эркек киши ооруканага түшкөн.
Соттук-медициналык экспертиза маркумдун денесиндеги "Н+Б" деген жазуу болбогонун айтып, ал жандандыруу учурунда колдонулган дефибриллятордун изи деген жыйынтык чыгарып берген.
Бирок кыздын атасы анын төшүнө тартылган жазууну өздөрү жазып койбогонун айтып, Sputnik Кыргызстан агенттигине кызынын төшүнө тартылган белгинин сүрөтүн алып келип көрсөткөн.
