БИШКЕК, 21-июн. — Sputnik. Жогорку Кеңештин депутаты Улугбек Ормонов Мамкеттик каттоо кызматы автоунааларды кайра каттоого жетишпей жаткандыктан, жеңилдетилген жол менен машиналарды каттоонун мөөнөтүн узартыш керектигин билдирди. Эл өкүлү мындай пикирин бүгүн, 21-июнда, парламент жыйынында айтты.
Белгилей кетсек, өкмөт тарабынан ишеним кат менен айдап жүргөн автоунаанын ээси көлүктү өз атына каттатып алуу үчүн ушул жылдын 2-апрелинен 2-июлуна чейин жеңилдик мөөнөтү берилген.
Мындан улам Sputnik Кыргызстан агенттиги бул жаатта абал чындыгында кандай экенин билүү үчүн Каттоо кызматынын Транспорттук каражаттарды жана айдоочулук курамды каттоо департаментинин директорунун орун басары Усейин Касмалиевге кайрылды.
Анын айтымында, унааларды жеңилдетилген жол менен азыркы ээсине каттатуу мөөнөтүн узартуу чечимин бир гана өкмөт кабыл алат. Азырынча бул тууралуу сөз боло элек.
"Эл өкүлү 400 миң унаа деп айтып жатат. Чындыгында ишеним кат менен жүргөн унаалардын так санын эч ким билбейт. Анткени бул документтин берилип жатканы 2012-жылдан бери каралбай калган. Андыктан жалпы каттоодо турган 1 миллион 200 миң машинанын дагы канчасы кайра каттоо процессинен өтүүгө муктаж экенин айттуу кыйын", — деди жетекчи.
Ал эми кезек күткөндөр жана кызматкерлердин жетишпей жаткандыгы боюнча абалды Касмалиев мындай түшүндүрдү:
Ошондой эле адис белгиленген мөөнөттүн ичинде жетишпей калган айдоочулар 2-июлдан кийин деле кайрыла берсе болорун айтты. Болгону ал убакта кызмат акысы азыркыдан эки эсе кымбат болот. Ушу тапта кайра каттоонун баасы орто эсеп менен 1500 сомдун тегерегинде.
