БИШКЕК, 21-июн. — Sputnik. Кыргызстанга Норвегиянын экс-премьер-министри, Адам укугу боюнча борбордун президенти Кьель Магне Бондевик келди.
Ал 20-июнда майыптардын маселеси жана тараптардын бул жаатта тажрыйба алмашуусу талкууланган конференцияга катышканын уюштуруучулар билдиришти.
Конференция INSPIRED+ деп аталган Евробиримдик каржылаган долбоордун алкагында өттү.
Конференцияда эмгек жана социалдык өнүктүрүү министри Таалайгүл Исакунова Кыргызстанда майыптар боюнча жазылган мыйзамдардагы кепилдиктер дээрлик иштебестигин айтты. Андан сырткары, тиешелүү чечимдерди кабыл алууда да калктын бул катмарына карата басмырлоо болорун кошумчалады.
Анткен менен министр жакында өкмөт башчы Мухаммедкалый Абылгазиев мамлекеттик органдарга майыптарды ишке алуудагы квотанын аткарылышы боюнча анализ жасоо башталганын билдиргенин маалымдады.
