ПЕКИН, 7-июн. — Sputnik. Кыргызстандын президенти Сооронбай Жээнбеков Эл өкүлдөрүнүн бүткүл кытайлык жыйынынын туруктуу комитетинин төрагасы Ли Чжаньшу менен жолугушуу маалында Кытай Кыргызстандын эң жакын досу деген пикирин билдирди.
Президент Кытайдагы реформаларга 40 жыл болгондугун жана бул аралыкта өлкө бир топ бийиктиктерди багындырганына токтолду.
"Биз Кытайдын жетишкендиктерине кубанабыз. Анткени силер бизге ишенимдүү коңшу, туруктуу өнөктөш жана жакын доссуңар", — деди Жээнбеков.
Ал эми Кытай парламентинин төрагасы жакында эле эки өлкөнүн ортосунда чоң мааниге ээ болгон стратегиялык өнөктөштүк боюнча декларацияга кол коюлганын белгиледи.
Эске салсак, учурда президент Жээнбеков Кытайда мамлекеттик сапары менен жүрөт. Ал 8-июнга чейин созулуп, андан соң өлкө башчы 9-10-июнь күндөрү ШКУ өлкөлөрүнүн жетекчилеринин саммитине катышмакчы.
