Жатын моюнчасындагы эрозиянын жеткен чеги — рак. Гинеколог илдет тууралуу

Биз жатын моюнчасынын эрозиясынын (жара) пайда болуш себеби, белгилери, алдын алуу жана дарылоо ыкмалары тууралуу сурадык.

Аныктамасы

Жатын моюнчасынын эрозиясы — аялдын жыныс мүчөсүндөгү жатын моюнчасынын былжыр челинин жаракатка кабылуусу.

Белгилери

Жара жатын моюнчасында челди сыйрып түшүрүп, жаралантат, көп учурда канайт. Жыныстык катнаш учурунда оорутат жана кан аралаш суюктук бөлүнүп чыгат. Жара ачык кызыл түстө жана тегерек формада болот.

Себептери

Бул ооруга ар кандай курактагы кыз-келиндер, аялдар чалдыгышы мүмкүн. Адатта төрөт учурунда жыныс мүчөсү жаракатка кабылган же бир нече жолу боюнан алдырган аялдарда көп кездешет. Эрозиянын пайда болуусунун себептери — инфекция, жыныстык катнашка эртелеп баруу, жатын моюнчасынын сезгенүүсү, организминдеги гормоналдык бузулуу, иммунитеттин түшүшү, жыныстык катнаш учурундагы этиятсыздык жана башкалар.

Жара бар экенин кантип билсе болот?

Жатын моюнчасынын эрозиясын аныктоо кыйынчылык деле туудурбайт, дарыгердин бир текшерүүсү жетиштүү. Эрозияны текшерүү үчүн гинеколог жатындан мазок (жука челден былжырды сүртүп алуу) тапшырууну сурайт. Андан соң кольпоскопия жана видеокольпоскопия аспаптарынын жардамы менен карап чыгат. Бул аппараттын жардамы менен жатындын абалын көрүүгө болот. Мындан тышкары, жыныстык органдардагы инфекциялар менен гормондорду текшерип аныктайт.

Дарылоо жолдору

Дарылоо оорунун пайда болгон себептерине жана жаранын өлчөмүнө жараша жүргүзүлөт. Маселен, гинеколог дары-дармек менен кетирүүнү сунуштайт. Андан сырткары, жара лазер нуру, радиоактивдүү хирургия жолдору менен да алынат. Учурда медицинанын ыкмалары арбын, аларды дарыгерлер өздөрү жасайт. Эскерте кетүүчү нерсе, эрозияны өз алдынча же эмчи-домчунун жардамы менен айыктырам деп, тобокелге барбаңыз. Жылына бир ирет гинекологдун көзөмөлүнөн өтүп турууу керек.

Оору менен күрөшпөсө эмне болот?

Эрозия белги бербей, оорутпай жүрө бериши мүмкүн. Бирок көңүл бурбай койсо, кайгылуу аякташы мүмкүн. Биринчи кезекте ооруга кабылган аял сырттагы инфецияларга туруштук бере албайт, төрөбөй калышы мүмкүн. Андан да кооптуу нерсе — өтүшүп кеткенде жатындын залалдуу шишигине (ракка) алып келет.