БИШКЕК, 30-май. — Sputnik. Ош облусунун “Достук” командасында ойногон үч бир тууган Байыш, Манас, Кыяз Ниязовдор тайпанын курамынан чыгып кетти деген маалымат социалдык тармакка жарыяланды.
Азырынча алардын командадан чыгышына эмне себеп болгону белгисиз. Маалыматтын чын-төгүнүн билүү максатында “Достуктун” жетекчиси Мыктыбек Туташов жана Ниязовдордун өздөрү менен байланышууга мүмкүн болгон жок.
Көк бөрү федерациясынын маалымат кызматы Ниязовдордун командадан чыгарылганы боюнча маалымат түшпөгөнүн билдирди.
“Жеңиш майрамына карата өтчү турнирге табыштаманы 5-майга чейин беришет. Азыркы тапта команданын курамын өзгөртүлөрү боюнча кабарыбыз жок”, — дешти федерациядан.
Эскерте кетсек, быйыл Нооруз майрымандагы мелдеште үч бир тууган тең “Достук” командасында ойноп, экинчи орунга ээ болушкан. Манас Ниязов “Мыкты чабуулчу” наамын утуп алса, Байыш Ниязов команданын капитаны болчу.
