БИШКЕК, 28-апр. — Sputnik. Кечээ, 27-апрель күнү, Бишкектин чок ортсунан үч жаштагы Чагылган аттуу бүркүт жоголуп кеткенин Sputnik Кыргызстан агенттигине Этно-маданий туристтик "Ысык-Көлдүн тескей жээк" дестинациясынын аткаруучу директору Бегимай Мукашева кабарлады.
Анын айтымында, куш Hyatt Regency мейманканасында өтүп жаткан шоу-программа учурунда асманга учуп кеткен бойдон кайрылган эмес.
"Туристтик форумдун алкагында мейманкананын алдында шоу-программа болуп жаткан. Кезек "Үндөк" таймашына келгенде бүткүт учуп барып алгач бактын башына конду. Коркуп кеттиби же ээсин таппай калдыбы, айтор, андан ары асманга учуп кетти", — деди Мукашева.
"Үндөк" — бүркүттөр арасындагы таймаш. Анда кушту 200 метрдей алыстыкка кондуруп алып, ээси үн салып чакырат. Кимдин бүркүтү биринчи келсе, жеңүүчү деп табылат.
Иш-чаранын уюштуруучулары жана куштун ээси аны көргөндөр болсо, 0 (772) 673307 номери боюнча кабарлап коюуну суранышууда.
