БИШКЕК, 23-апр. — Sputnik. Бишкектин Октябрь райондук соту Башкы прокуратуранын кызматкеринин унаасын жардырды деп шектелип жаткан адамга өкүм чыгарды. Бул тууралуу аталган соттон Sputnik Кыргызстан агенттигине билдиришти.
Сот отуруму 20-апрель күнү болгон.
Эске салсак, 2016-жылдын 29-июлунда Башкы прокуратуранын ички иликтөөлөр бөлүмүнүн ага прокурору Эркин Курманалиевдин унаасына коюлган жардыруучу зат жарылып кеткен. Жыйынтыгында унаанын ээси оор жаракат алган.
Кол салган адамдын ата-энеси чындап эле Курманалиевдин ата-энесине 60 миң 500 доллар карызы бар экенин Башкы прокуратура тастыктады.
Ошондой эле анын үйүнөн жардыруу болгон жерде колдонулган затка окшогон материалдар табылганы айтылды.
Айтмырзаевдин көрсөтмөлөрүнө караганда, Курманалиев аны карызды төлөп бербесең, ишиң шылуундук катары каралат деп коркуткан.
Прокурордун ата-энеси карызын улам сурай бергендиктен, 2015-жылдын башында Айтмырзаев аларга өз үйүн каттатып берүүгө аргасыз болгон.
Прокуратуранын маалыматына караганда, Айтмырзаев үй-бүлөсүн аталган үйдөн алып чыгып кетүүдөн жана Курманалиевдин талаптарынан коркуп, 29-июлга караган түнү жабырлануучунун унаасына жарылуучу зат коюп кеткен.
