БИШКЕК, 18-апр. — Sputnik. "Ош" базарынын аймагындагы "Кыял" чакан базарында кызыл жана кара калемпир себеленип тартылган табышмактуу тегеректер пайда болду. Бул тууралуу Sputnik Кыргызстан агенттигинин кабарчысына өз коопсуздугунан чочулап, атын атагысы келбеген сатуучулар билдирди.
Алардын айтымында, мындай тегеректер "Ош" базарында буга чейин күйүп кеткен жерлерде дагы коюлган. Бирок ал учурда сатуучулар көңүл бурган эмес.
"Кара жана кызыл калемпирден себеленип чийилген тегеректер "Кыял" базарынын аймагында 17-апрелге караган түнү саат үчтөрдө пайда болду. Кароолчулар базарды саат 2.30да кыдырып чыкканда шек жараткан эч нерсе жок болчу. Кийинки текшерүүгө үч сааттан кийин чыкканда ушул тегерекчелер табылды. Базар аймагы толугу менен бекитилип турган", — деди сатуучулардын бири.
Ошондон кийин соодагерлердин арасынан 20дан адам түнкүсүн чыгып, күзөтчүлөр менен бирге кайтармай болду. Алар толук коопсуздукту сезмейинче ошол жерде болорун айтышты.
Бишкек ШИИБинен "Ош" базарында чыккан өрт боюнча козголгон кылмыш ишинин алкагында бардык түшкөн маалыматтар текшерилип жатканы кабарланды.
Эске салсак, 13-апрелде "Ош" базарында үчүнчү жолу ири өрт чыккан. ӨКМ Киев менен Бейшеналиева көчөлөрүнүн кесилишинде болгон өрт атайылап коюлган деп айткан.
