БИШКЕК, 18-апр. — Sputnik. Премьер-министр Сапар Исаков Казакстандын Кыргызстандагы толук ыйгарым укуктуу элчиси Карим Кокрекбаев менен жолугушканын өкмөттөн маалымдашты.
Премьер-министр эки өлкө биртууган болгондуктан өкмөт Казакстан менен болгон мамилени өнүктүрүүгө өзгөчө көңүл буруп жатканын белгилеген. Ал ошондой эле айыл чарба продукцияларын чет өлкөгө, анын ичинде Казакстанга экспорттун көлөмүн көбөйтүү боюнча иштер жүрүп жатканын айткан.
"Соода-сатыктан сырткары, эки өлкө ортосундагы маданий-гуманитардык жана спорт жаатында да кызматташууну жакшыртуу чоң мааниге ээ. Буга байланыштуу III Дүйнөлүк көчмөндөр оюндарына активдүү катышууга чакырам", — деп Исаков билдирген.
Ал эми элчи Көкрекбаев кызматташуу боюнча актуалдуу маселелер өлкөнүн бир катар министрликтери менен сүйлөшүүлөр жүрүп жатканын билдирүү менен, үстүбүздөгү жылдын май айында Астанада өтө турган экономикалык форумга Казакстандын премьер-министри Бакытжан Сагинтаевдин чакыруусун тапшырган.
