БИШКЕК, 16-апр. — Sputnik. Премьер-министр Сапар Исаков коммерциялык банктардын, микрокредиттик уюмдардын жетекчилери менен Бишкек, Жалал-Абаддагы базарлардагы өрттөн жабыркаган ишкерлерге жардам кылуу маселесин талкуулоо үчүн жолукту. Бул туурасында өкмөттүн маалымат кызматынан кабарлашты.
Банктардын, микрокредиттик уюмдардын жетекчилери жабыркагандарга көмөк көрсөтүүгө жана колдоо көрсөтүүнүн мүмкүн болгон ыкмаларын иштеп чыгууга даяр экендиктерин билдиришти.
Эскерте кетсек, кырсык 13-апрелге караган түнү болгон. Өрттүн очогу Киев менен Кулиев көчөлөрүнүн кесилишине жакын "Берекет" базарында жайгашкан. ӨКМ базар атайылап өрттөлгөнүн айтып, милиция кылмыш ишин козгоду. 5200 чарчы метр аянтты жалмаган өрт 16 сааттан кийин толук өчүрүлгөн. Ушул эле күнү Жалал-Абаддын борбордук базарында өрт чыгып, соодагерлерге бир топ зыян тарттырган.
