БИШКЕК, 29-мар. — Sputnik. Борбор калаада бүгүн "Мектеп курулушунун динамикасы жана авариялык мектептердин абалы" деп аталган коомдук угуу болот. Бул туурасында Булан институтунан кабарлашты.
Анда республиканын аймагындагы авариялык абалдагы, кооптуулук жаратып турган мектептер жагдайы, билим берүү мекемелеринин курулуш сапаты, жоопкерчилик туурасында сөз болот. Андан сырткары, аталган жайларды ашар жолу менен курууга тыюу салуу зарылбы деп аталган маселе да талкууга алынат.
Булан институтунан учурда авариялык абалдагы мектептердин жетекчилери бул көйгөй туурасында өздөрү айтып берерин билдиришти.
Коомдук угуу "Кыргызконцепт" мекемесинин жыйындар залында саат 14:00дө башталат.
Буга чейин Булан институту Кыргызстандагы мектеп имараттарынын акыбалы тууралуу атайын иликтөө даярдаган.
