БИШКЕК, 28-мар. — Sputnik. Кыргызстанда спирт ичимдиктерин интернет аркылуу жарнамалоого тыюу салган мыйзам иштей баштайт. Бул тууралуу президенттин маалымат кызматынан кабарлашты.
Өлкө башчы Сооронбай Жээнбеков Жогорку Кеңеш 2018-жылдын 15-февралында кабыл алган жарнама жөнүндөгү мыйзамга өзгөртүү киргизүү тууралуу документке кол койгон.
"Мыйзамдын максаты — технологиялардын өнүгүшүнө байланыштуу жарнама тууралуу мыйзамды жакшыртуу, ошондой эле калктын ичимдикке болгон керектөөсүн азайтуу болуп саналат. Мыйзамга киргизилген өзгөртүүлөргө ылайык, ичимдиктерди интернеттен жарнамалоого тыюу салынат", — деп айтылат маалыматта.
Экономика министрлигинен аталган мыйзамда айып пулдун көлөмү көрсөтүлбөгөнүн маалымдашты. Бирок Административдик жоопкерчилик боюнча кодексте мыйзам бузгандарга атайын жобо каралган:
Жарандар менен жеке жактарга — 1-2 миң сом;
Кызмат адамдарына — 5 миңден 10 миң сомго чейин;
Юридикалык жактарга – 10 миңден 100 миң сомго чейин.
Мыйзам 15 күндөн кийин күчүнө кирет.
