БИШКЕК, 22-мар. — Sputnik. Борбор калаада сулуулардын "Мисс Бишкек – 2018" деп аталган сынагы өтөт. Бул туурасында аталган иш-чаранын уюштуруучусу Рыскүл Намазбекова кабарлады.
Ажарлуу кыздардын сынагы 2012-жылдан тарта өткөрүлүп келет. Былтыркы жарышта 17 жаштагы Айзирек Мыктыбекова жеңишке жетип, кийинчерээк турмушка чыккандыктан аталган наамдан баш тарткан.
Уюштуруучулардын айтымында, конкурска баш-аягы болуп 60 кыз катышса, финалга алардын 23ү чыккан.
"Сынактын өзгөчөлүгү ага Бишкекте жашаган бардык кыздар катыша алат. Жашы 15 менен 28дин тегерегинде", — деди Намазбекова.
Сынак 28-мартта шаардагы банкет залдарынын биринде өтөт. Жеңген сулуу ажарлуу кыздардын эл аралык сынагына катышат.
Буга чейин кыргызстандык кыз Miss Asia-2017 сынагында алдыңкы алты сулуунун катарына кирген.
