Жумгал районундагы мектептердин бирине Түркия тарабынан бөлүнгөн 37 миллион сомдун дайыны жок. Бул тууралуу Жыргалбек Турускулов парламенттик жыйында сүйлөп жатып маалымдады.
Анын айтымында, бөлүнгөн каражаттын жалпы суммасы 59 миллион 72 миң сомду түзөт.
"1-этапта 22 миллон сом бөлүнүп, мектептин 80 пайызы бүткөн. Дубалы тургузулуп, терезелери коюлуп, чатыры жабылган. Мектеп бүтпөй калгандыктан, жети жылдан бери балдар чатырда, бош үйлөрдө сабак окуп, толук кандуу билим ала албай жатышат. 59 миллиондон ашык каражат бөлүнгөндөн соң мектеп бүтүшү керек болчу. Тилекке каршы, сумманын жарымынан көбү кайда кеткендиги дайынсыз", — деди депутат.
Турускулов 2018-жылдын сентябрь айынан баштап окуучулар жаңы мектепте билим алуусун тилек кыларын кошумчалады.
