Элеттик тентек музыкант. Курмангазы Азыкбаев 1962-жылы 23-февралда Нарын облусунун Ак-Талаа районундагы Баетов айылында туулган. Балалыгы Нарын шаарында өтүп, багып алган агасынын колунда тарбияланган. Музыкага кызыккан окуучу алгач гитара черткенди өрт өчүрүүчүлөрдөн үйрөнгөн. Мектепти аяктагандан кийин Германияга аскер кызматын өтөгөнү кетип, ал жакта башка элдин аспаптарын көрүп кызыгуусу күчөйт.
Пол жууп, уста болуп… Эл артисти колуктусу жана балдары менен 13 жыл жатаканада жашаган. Түгөйлөр уул-кыздарынын курсагын тойгузуу үчүн жатакананын полун жууп, уста болуп иштеген күндөрү болгон. Азыкбаев "ал кезеңдер жубайым экөөбүздү гана эмес, балдарымды дагы чыйралткан" деп эскерет ал күндөрдү.
Күнүнө алты саат аспапта ойнойт. Өнөрпоз күнүнө жок дегенде алты саат музыка менен алпурушат. Чыгармачыл инсан күн сайын тамак-ашын даярдап алып, аспап сактаган бөлмөсүндө чер жазат. Антпесе анын өткөргөн убактысы өтөсүнө чыкпай калат. Андан сырткары, ал кыргыздын маданиятын изилдеп, устачылык кылып жаңы музыкалык аспаптарды жасоо менен алек.
Кыргызды дүйнөгө тааныткан. Кыргыздын күүсүн, аспаптарын дүйнө жүзүнө тааныткан Азыкбаев жер бетин түрө кыдырып, жүздөн ашык өлкөдө болгон. Ал улуттук күүлөрдөн тарта классикалык музыкаларды 37 аспапта ээн-эркин аткара алат. Кээде музыкант айрым президенттердин чакыруусу менен башка өлкөлөргө барып, чет элдиктерди таң калтырып келет.
Өнөрлүү уул-кыздын атасы. Таланттуу инсан жубайы Зейнеп экөө үч эркек, бир кызды тарбиялап өстүргөн. Улуу баласы Нургазы 11 тилде сүйлөп, 22 аспапта ойнойт. Ал эми Нурсултан менен кызы Нурайым 12 аспапка жан киргизет, кичүүсү Бексултан чет тилдерди өздөштүрүү менен алек.
Баса, таланттуу инсан буна чейин айылга кат да жазган.
