БИШКЕК, 29-янв. — Sputnik. Улуттук госпиталдагы жылуулук боюнча көйгөй куурлардагы сууну төгүп салгандан улам болгондугун Саламаттык сактоо министрлигинин маалымат кызматынан кабарлашты.
Жылыткан система 2018-жылдын 28-январынан 29-январына караган түнү Улуу ата мекендик согуштун ардагерлери дарыланган имаратта иштен чыккан.
Саламаттык сактоо министри Талантбек Батыралиев аталган тармактагы эскилиги жеткен система аяздын каарына араң чыдап жаткандыгын айтты.
"Түнгө чейин иштешти. Температура төмөндөй баштаганда муз тоңуп, ичиндеги сууну төккөнгө туура келген. Ал эми ысык суу келгенде ал мурдагыдай иштей албай калган. Түндө саат экиге чейин карашты. Оңдоп-түзөө иштери дагы деле уланууда", — деди министр.
Улуттук Госпиталдын башкы дарыгери Динара Сагинтаева имараттагы сууктан улам дарыланып жаткандардын бир бөлүгүн үйүнө, калганын башка бөлүмдөргө которушкандыгын айтты.
Бишкекти жылуулук менен камсыздай турган станцияда авария болгондон бери төрөт үйлөрү менен ооруканаларда жылыткычтардын жардамы менен орточо температура кармалып турат.
