БИШКЕК, 28-янв. — Sputnik. Борбор калаанын жашоочуларына жылытуу пункттары жана ысык тамак уюштуруу иштери башталды. Бул туурасында ӨКМдин маалымат кызматы билдирди.
Премьер-министр Сапар Исаков шашылыш түрдө Бишкек ТЭЦке барып түзүлгөн кырдаал менен жеринен таанышкан. Өкмөт башчы жылытуу пункттары менен ысык тамак уюштуруп, муктаждарга жууркан таратуу иштерин жүргүзүү тапшырмасын берген.
"ӨКМдин эки унаасына 30 чатыр, 20 генератор, 30 меш, 300 жууркан жүктөлүп, 25 куткаруучу менен Бишкек шаарына саат 21:30да келишкен. Азыркы учурда Ленин районуна жети чатыр, жети меш, 70 жууркан, Биринчи Май районуна беш чатыр, беш меш, беш жууркан таратылды. Учурда Октябрь жана Свердлов райондоруна да жеткирилүүдө. Ал эми генераторлор атайын буйрукка чейин Бишкек шаардык куткаруу кызматына түшүрүлдү", — деп ӨКМден маалымдашты.
Ал эми саат 22.00дөн кийин ТЭЦ системасы калыбына келтирилип этап-этабы менен бир сутканын ичинде үйлөрдүн бардыгына жылуулук берилерин өкмөттөн кабарлашты.
ТЭЦтеги авариядан улам Бишкек шаарындагы абал боюнча Sputnik Кыргызстан агенттигинин тексттик трансляциясынан окуңуздар.
