БИШКЕК, 17-янв. — Sputnik. Учурда Республикалык инфекциялык ооруканада сасык тумоо дарты менен 120 адам дарыланып жатат. Бул тууралуу аталган оорукананын башкы дарыгери Гүлжигит Аалиевдин сөзүнө таянып Саламаттык сактоо министрлиги билдирди.
Маалыматка караганда, дарыланып жаткандардын көпчүлүгү 14 жашка чейинки балдар.
"Кечээ, 16-январь күнү, биздин ооруканага 37 адам кайрылган, 26сын жаткырдык", — деди Аалиев.
Дарыгер кошумчалагандай, учурда сасык тумоо жана грипп боюнча абал туруктуу. Жардам сурап кайрылгандар азайып калгандыктан, ооруканада орун жетишсиздиги жок.
