БИШКЕК, 28-дек. — Sputnik. Белгилүү режиссер Актан Арым Кубаттын "Кентавр" тасмасы 28-декабрдан тарта Германиянын кинотеатрларында көрсөтүлө баштайт. Бул тууралуу Sputnik Кыргызстан агенттигине Кинематографисттер союзунун уюштуруу иштери боюнча катчысы Талант Төлөбеков билдирди.
Анын айтымында, кыргызстандык тасма Германиянын Берлин, Лейпциг, Дрезден, Гамбург сыяктуу 41 шаардын 47 кинотеатрында көрсөтүлмөкчү.
"Тасма аталган өлкөнүн алты калаасында тар чөйрөгө көрсөтүлгөн. 13-16-декабрь күнү өткөн иш-чарага Актан Арым Кубат өзү катышты. "Кентавр" тасмасынын саундтректери сунушталган музыкалык альбом да сатыкка чыгарылды. Фильмдин минтип чет жакта прокатка чыгышы биз үчүн чоң сыймык", — деди Төлөбеков.
Эскерте кетсек, "Кентаврдын" дүйнөлүк премьерасы үстүбүздөгү жылдын февраль айында эл аралык Берлин кинофестивалынын "Панорама" программасынын алкагында болуп өткөн.
"Кентавр" — өз элинин улуттук баалуулуктарынын сакталып калышына жан үрөгөн адам тууралуу тасма.
