БИШКЕК, 19-дек. — Sputnik. Кыргызстандын мамлекеттик мүлкү толугу менен санариптештирилгенин Sputnik Кыргызстан агенттигинин мультимедиалык маалымат борборунда берген маалымат жыйынында Маммүлк фондунун төрагасы Дүйшөнбек Зилалиев билдирди.
Анын айтымында, мамлекеттик мүлктү санариптик жол менен инвентаризациялоо иштери 100 пайыз аяктады.
"КРдин мамлекеттик мүлкүнүн бирдиктүү реестри" маалыматтык системасынын презентациясы Sputnik Кыргызстан агенттигинин мультимедиалык маалымат борборунда болду.
Көз карандысыз адис Улук Кадырбаевдин пикиринде бул реестрдин түзүлүшү мамлекеттик-жеке өнөктөштүктү өнүктүрүүгө чоң жардам берет.
"Ар бир салык төлөөчү мамлекеттин менчигинде канча имарат, жер тилкеси бар экенин каалаган убакта текшерип көрсө болот. Маалыматты ЖМКлар, жарандар ар дайым көрүп тургандыгы үчүн мамлекеттик машина дагы эффективдүү иштегенге аракет кылат", — деди Кадырбаев.
Колдонуучулар жаңы системаны ergi.fgi.gov.kg дареги аркылуу көрө алат.
