БИШКЕК, 18-дек. — Sputnik. Борбор калаанын Аламүдүн-1 кичи районунан 14-декабрь күнү жаңы төрөлгөн ымыркайдын сөөгү табылды. Бул тууралуу Sputnik Кыргызстан агенттигине Бишкек ШИИБинин маалымат кызматынын башчысы Адыл Оморов билдирди.
Буга чейин ЖМК өкүлдөрү Бишкектин Аламүдүн-1 кичи районунда Чоң Чүй каналынын жээгинен мойнунда муунтулган тактар калган тогуз айлык ымыркайдын сөөгү табылганын жазышкан.
"Ымыркайдын сөөгү табылганы чын. Ал жаңы төрөлгөн наристе экен. Бирок бул окуя 14-декабрда катталып, анын сөөгү Чоң Чүй каналынын жээгинен эмес, Бишкектин ТЭЦ каналынан табылган. Баланын денесинен муунтулган да, зордуктоо белгилери да аныкталган жок", — деди Оморов.
Аталган факты боюнча кылмыш иши козголуп соттук-медициналык экспертиза дайындалды. Учурда милиция ымыркайдын ата-энесин издеп жатат.
