БИШКЕК, 14-дек. — Sputnik. Ислам кызматташтык уюму (ИКУ) Чыгыш Иерусалимди Палестинанын борбору деп тааныды. Бул тууралу түркиялык Hurriet басылмасы ИКУнун саммитинде кабыл алынган резолюцияга шилтеме берип жазып чыкты.
Уюм Иерусалимди Израилдин борбору деп тааныган АКШны оюнан кайтууга чакырды. Ошондой эле кабыл алынган документте АКШ Жакынкы Чыгыштан оолактап, өнөктөш болбой калганы белгиленген.
Саммитке Кыргызстандын вице-премьери Аскарбек Шадиев катышканын өкмөттүн маалымат кызматынан кабарлашты.
"Иерусалимге байланыштуу чечимдердин бардыгы эл аралык укук нормаларына жана БУУнун Коопсуздук кеңешинин резолюциясына дал келиши керек. Ойлонулуп кабыл алынган чечим гана Жакынкы Чыгыштагы тынчтыкты жокко чыгарбайт", — деди Шадиев.
АКШ президенти Трамп 6-декабрда Иерусалимди Израилдин борбору деп тааныган документке кол коюп, Тель-Авивдеги америкалык элчиликти көчүрүү боюнча документке кол койгон.
