Теле жаңы ачылганда монтаж деген жок, түз эфирде гана иштешкен. Бул тууралуу Олжобай Токтосунов Sputnik Кыргызстан радиосуна маек куруп жатып билдирди.
Анын айтымында, техника жетишсиз болгондуктан алгачкы теле кызматкерлери камера менен гана иштөөгө аргасыз болушкан.
"Илим, билимдин өскөндүгүнөн улам телевидение пайда болду. Алгач башка өлкөлөрдө ачылып, 1958-жылы Кыргызстанда телекөрсөтүүлөр эфирге чыга баштады. Жаңы баштагандар менен бир кеңседе отуруп калдым. Ошондо Амантай Ниязалиев, Балташ Кайыпов деген аксакалдар айтып беришчү. Техника жетишсиз, монтаж деген түшүнүк жок. Камера менен түз эфирге чыгып, туура эмес болуп бара жатса чуркап барып сүрөттү коюп, музыка жаңыртып жиберишчү экен", — деди Олжобай Токтосунов.
Ал ошол кездери дикторлордун атагы таш жаргандыгын кошумчалады.
