Эркектин эркектей болгону жакшы, бирок азыр айрым мырзалар аялдардан кем калбай ушакты узун чоюп, ар кимдин жашоосун талкууга алганды адатка айдандырып алгандай. Уу-дуу кеп укса, эптеп эле кумурскадан пил жасап эле жатып калчу болду. Айтор айрымдары өтө эле майдаланып баратат.
Сөздөн ишке өтөлү. Ар кимдин ишин сындап отурбай, ар ким өз ишин кылган жакшы. Мындай мырзалардын катарына мекендешибиз Кубанычбек Алибековду кошсок болот. Ал Москва шаарында өз күчү менен медициналык борбор ачып, аны ийгиликтүү иштетип келет.
Намыскөй жигиттер. Кыргыздын намысын коргоп, өлкө атын дүйнөгө тааныткандар бар. Алардын бири балбан Канат Бегалиев. Ырас, бир тармакта отура бербей, өзүн саясат айдыңында сынап көрүүнү чечиптир.
Дардаңдап мансапка көпкөндөр да бар. Бишкектин көчөлөрүнүн биринен "ала көөдөн Дардаңбай" каршы тилкеге чыгып, айдап келе жатканда аны экс-президент Роза Отунбаеванын баласы Атай Садыбакасов видеого тартып алган. Милиция кармады деп маалымат таратты эле, көрсө кармаган бала ал эмес экен.
Жаңы шайланган президентти деле жулмалабай колдоо көрсөтө билгенди үйрөнөлү. Кечээ өлкө башчы Сооронбай Жээнбеков Москвага расмий иш сапары менен барып, РФ президенти Владимир Путин, премьер-министри Дмитрий Медведев жана КВН лигасынын президенти Александр Масляков менен жолугушту.
Ал эми Кыргызстандын өкмөт башчысы Сапар Исаков депутаттардын суроолоруна жооп берип жатып, техникалык кароону кайра киргизүү зарыл экендигин жана унааны ишеним кагазы менен айдоого качан тыюу салынарын айтты.
Эки-үч күндөн бери соцтармакта күндүн темасына айланган көп аялдуулук, экинчи аял, токол маселеси айрымдарга майдай эле жагып жатат. Токол алганы үчүн жазасын өтөп бүткөн эркек кайда барат деген суроо менен кабарчылар юристтердин оюн угуп көрдү. Юрист эмне деп жооп бергенин бул жактан окуңуздар.
Валюта наркы. Сомдун баасы долларга карата орто эсеп менен 69.65(сатып алуу) жана 69.81 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 44.50 сом, АИ-92 үлгүсүндөгүсү 41.60 сом, ал эми дизель майы 38.50 сомдон сатылууда.
Соңку сөз. Эр жигит эл четинде, жоо бетинде!
Аманчылык каалап, Таалайгүл Усенбаева.
