БИШКЕК, 26-ноя. — Sputnik. Жогорку Кеңештин депутаты Кенжебек Бокоевдин кызына кол салгандарды издөө иштерине Бишкек ШИИБинин өздүк курамы тартылды. Бул тууралуу Sputnik Кыргызстандын кабарчысына шаардык милициянын башчысы Сталбек Рахманов билдирди.
Окуя 24-ноябрь күнү 12-кичи райондо болгон.
Белгисиз адам үйүнө кирип келе жаткан кызды бутка бычак сайып, колундагы сумкасын жулуп кеткен.
Рахмановдун айтымында, издөө иштери уланып жатат.
"Азыр канча милиционер издеп жаткандыгын айта албайм, бирок Бишкек ШИИБинин жеке курамы тартылды", — деди Рахманов.
Учурда укук коргоо органдарынын кызматкерлери 12-кичи райондун тургундарын суракка алууда. Шаардык милиция бөлүмдөрүнүн биринен билдиришкенине караганда, ушул тапта депутаттын кызына кол салган адамдарды издөө боюнча аталган кичи райондо участкалык 40 милиционер иштеп жатат.
