БИШКЕК, 21-ноя. — Sputnik. Дүйшөмбү күнү премьер Сапар Исаков бир катар спирт ичимдиктерине карата акциздин баасын көтөрүү боюнча өкмөттүн токтомуна кол койду.
Документ кол коюлгандан кийин 15 күндөн соң күчүнө кирет. Акциз баасы жогорудай турган ичимдиктер төмөндө:
— курамында спирти көп суусундуктар менен бальзамдар — 60 сомдон 70 сомго чейин;
— шарап жасалчу материалдар — 3 сомдон 4 сомго чейин;
— шарап — 9 сомдон 12 сомго чейин;
— идишке куюлган жана куюлбаган сыра — 14 сомдон 17 сомго чейин;
— спирти аз ичимдиктер — 60 сомдон 70 сомго чейин;
— коньяк (коньяк спиртинен башкасы) — 42 сомдон 52 сомго чейин;
— газдалган шарап (шампан) — 34 сомдон 45 сомго чейин.
Спирт ичимдиктерин өндүрүүчүлөр ассоциациясынын президенти Турсунбек Куренкеев акциздердин көтөрүлүшү баага түздөн-түз таасир берерин Sputnik Кыргызстан агенттигине билдирди. Мисалы шарапка карата акциздин баасы 9 сомдон 12 сомго чейин көтөрүлүшү анын наркынын 1-1,5 сомго чейин кымбатташына алып келет.
