БИШКЕК, 10-ноя. — Sputnik. Учурда Кыргызстан эл аралык университетин мамлекеттин карамагынан Бишкек шаардык мэриянын менчигине өткөрүү иштери жүрүп жатат. Ал арада айрым ЖМКлар мэрия окуу жайдын кеңсесине кийим саткан бутиктерди жайгаштырууну көздөп жатканын жазышууда.
Аталган университеттин Координациялык кеңешинин жетекчисинин кеңешчиси Асылбек Айдаралиев бул туурасында окуу жайга расмий билдирүү келе электигин Sputnik Кыргызстан агенттигине билдирди. Бирок мэрия буга чейин ал жерге шаардык кеңешти көчүрүп келүүнү пландаганын айтат.
"Мэрия мындан жарым жыл мурун бул жакка шаардык кеңешти көчүрүп келе турганын маалымадаган. Бирок кеңсенин ичин реставрациялоо үчүн 150 миллион сом керектелгендиктен маселе ошону менен көтөрүлбөй калган. Эми болсо кийим саткан дүкөндөргө ижарага берип бутикке айландырууну көздөп жатат деген кептер айтылууда. Ага карабай өзүбүз демөөрчүлөр аркылуу эки миллион доллар таптык. Жаңы жылдан кийин оңдоо иштери башталат", — деди Айдаралиев.
Ошондой эле ал окуу жайды дүкөнгө айландыруу мыйзамга каршы келерин айтып, эгер мэрия мындай кадамга барса сотко кайрыла турганын кошумчалады.
"Кыргызстан эл аралык университети азырынча Мамлекеттик мүлк фондусунун карамагынан мэриянын балансына өтө элек. Толук түрдө өткөрүлгөндөн кийин гана кандай максатта колдонулары белгилүү болот", — дешти мэриядан.
Өз кезегинде Билим берүү министрлиги университет билим берүү максатында гана колдонулушу керек деген пикирди карманат.
"Ал окуу жайды Бишкек мэриясынын муниципалдык менчигине өткөрүү боюнча токтомдун долбоору өкмөттүн кароосунда турат. Университетти билим берүү максатында гана өткөрүп берүүгө болот", — деп билдирди министрлик.
Кыргызстан эл аралык университети 1993-жылы негизделген. Учурда 10 миң студент билим алат. Окуу жайдын ичиндеги ремонттун начардыгынан айрым бөлүктөрү узак мөөнөттөн бери иштебей келет. Объкт 1954-жылы курулуп, политехникалык техникум катары колдонууга берилген.
