Унааны кайра каттоонун баасын азайтуу боюнча токтом долбоору иштелип жатканын Sputnik Кыргызстан агенттигине Транспорттук каражаттарды жана айдоочулук курамды каттоо департаментинин директорунун орун басары Усейин Касмалиев билдирди.
"Айдоочулар оңоюна карап алган унааны өзүнө каттатпай, ишеним кат менен айдап жүрүшөт. Анткени ишеним каттын баасы арзан. Мисалы, орто эсеп менен алганда ишеним катты 700 сомдон 1500 сомго чейин алсаң, кайра каттоого 2,5-3 миң сомдой беришиң керек", — деди Касмалиев.
Маалыматка караганда, жаңы иштелип жаткан токтомдо бир пайыздык төлөмдү 0,3 пайызга түшүрүү маселеси каралууда. Жалпак тил менен айтканда, бир пайыздык жыйым унаанын чыккан жылына, кубаттуулугуна жана тарифтик торчонун негизинде орточо эсеп менен 1-1,2 миң сомго жетет. Эгер жаңы токтом кабыл алынып калса, бул төлөм 300 сомдун тегерегинде болуп калат.
Эскерте кетсек, ушул күнгө чейин жолдогу көзөмөл камераларына катталган эреже бузуулар үчүн айып кагаздары унаанын алгачкы ээсине барып жатканы боюнча нааразычылыктар болуп келген.
