Кыргыздын атактуу инсандарынын сүрөтү 1958-жылы Москвадагы Казань вокзалында тартып алынган. Солдон оңго актер Аманкул Куттубаев, опера ырчысы Сайра Кийизбаева, актерлор Ашыралы Боталиев, Муратбек Рыскулов, актриса Бакен Кыдыкеева жана төкмө акын Токтоналы Шабданбаев.
Анда москвалыктарга "Токтогул" операсы, "Ак куулар көлү", "Анар", "Чолпон" балеттери жана концерттик программа көрсөтүлүп, соңунда Виктор Власов, Абдылас Малдыбаев менен Владимир Ференин "Салам, Москва!" аттуу чыгармасы 500 адамдан турган хордун аткаруусунда тартууланган. Эң негизгиси 1939-жылы өткөн I декададан бир топ айырмаланып, элдин купулуна толуп, жакшы кабыл алынган.
Маданий саамалыкка Никита Хрущев катышып, Кыргызстандан Исхак Раззаков, Төрөбай Кулатов, Күлүйпа Кондучалова барган. Анда Муратбек Рыскулов, Сайра Кийизбаева жана Бүбүсара Бейшеналиева СССРдин эл артисти болуп, ондогон катышуучулар түрдүү даражадагы мамлекеттик сыйлыктарга татыган.
