БИШКЕК, 1-ноя. — Sputnik. Президент Алмазбек Атамбаев "Тарых жана ата-бабаларды эскерүү күндөрүнө" карата тарыхый инсандар менен ата-бабаларды эскерет. Бул тууралуу президенттин сайтына жарыяланды.
Билдирмеге караганда, ажо 7-ноябрда 1916-жылдагы трагедиялуу окуялардын жүрүшүндө курман болгондорду эскерүү мемориалына, саясий репрессиянын курмандыктарынын эстелик-мемориалына, Чыңгыз Айтматовдун бейити жана 2010-жылдагы Апрель элдик революциясынын курмандыктарын эскерүү мемориалына гүлчамбар коет.
Ошондой эле президент Бишкек шаарындагы Кыргызстан менен Россиянын достук монументинин айланасында жаңыланган гүлбакчанын бет ачарына катышат.
Мамлекет башчыны жаңы шайланган президент Сооронбай Жээнбеков, Жогорку Кеңештин төрагасы Дастан Жумабеков, премьер-министр Сапар Исаков жана Жогорку соттун төрайымы Айнаш Токбаева коштоп жүрөт.
"Тарых жана ата-бабаларды эскерүү" күнүнө арналган иш-чаралар өлкөбүздүн бардык аймактарында, облустардын жана райондордун жетекчилеринин катышуусунда өткөрүлмөкчү.
Белгилей кетсек, буга чейин Атамбаев 7-8-ноябрды жыл сайын белгиленүүчү "Тарых жана ата-бабаларды эскерүү күндөрү" деп жарыялоо боюнча жарлыкка кол койгон.
