БИШКЕК, 31-окт. — Sputnik. Арстандын күчүгүнүн ээси ким экени жана анын дареги аныкталды. Бул тууралуу Sputnik Кыргызстан агенттигине Жаратылыш ресурстары департаментинин жаныбарларды коргоо боюнча бөлүм башчысы Абай Жаныбеков билдирди.
Анын айтымында, арстандын күчүгүнүн ээси "Ак-Эмир" рыногунун аймагында жашаган 1990-жылкы Эртай Искаков болуп эсептелет.
"Биздин божомол боюнча жаныбар өлкө аймагына контрабандалык жол менен киргизилген. Бул үчүн жаранга айып пул салынып, 3 жылдан 5 жылга чейин эркинен ажырашы мүмкүн. Арстандар кызыл китепке киргизилген. Буга байланыштуу бул жаныбарды чек арадан алып өтүү үчүн тийиштүү уруксат кагазы керек. Учурда жаранды милиция издеп жатат", — деп бөлүм башчы билдирди.
Анткен менен Эртай Искаков мындай айыптоолорду четке какты. Ал өзүнүн Facebook баракчасына жаныбар менен болгону сүрөткө гана түшкөнүн жана ага эч кандай тиешеси жок экенин билдирди.
"Бул жөн гана сүрөт. Көчөдө кетип баратып бир киши арстандын күчүгүн кармап турганын көрдүм. Сүрөткө түшүп алууну сурансам, каршы болгон жок. Шаардан мындай сонун жаныбарды күнүгө эле көрө албайсың да туурабы? Күчүк кайдан алынып, ээси ким экенин дагы билбейм. Байланыш номурларын жазып алган эмесмин", — деди ал.
Искаков менен Sputnik агенттигинин кабарчысы Facebook аркылуу жазышканда ал өзүнүн жазган постун кайталап, аны милиция издеп жүргөнүн укпаганын билдирди.
