БИШКЕК, 26-окт. — Sputnik. "Ислам мамлекети" террордук тобунун көзөмөлүндөгү аймактагы 500дөй кыргызстандыктын 44ү гана мекенине кайткан. Бул тууралуу Американын Soufan Center борбору тарабынан жүргүзүлгөн изилдөөдө айтылат.
Ага ылайык, учурда "Ислам мамлекетинин" катарында 3417 россиялык жүрөт. Сан жагынан алганда алар биринчи орунда турат. Экинчи орунда Сауд Аравиясы (3224 киши), үчүнчүдө Иордания (3000 киши) турат. Ошентип алдыңкы бештикти Тунис (2926 киши) менен Франция (1910 киши) толуктайт.
Өз жарандарын кайтаруу ниетин акыркы эки жылдан бери 33 мамлекет билдирген. Жалпысынан Борбор Азиядагы мамлекеттердин 500дөй гана жараны мекенине кайтып келген. Россияга болсо 400 киши кайткан. Согушуп жүргөн жарандардын мекенине кайтуусу боюнча биринчи орунда Европа турат (1200 киши).
Эксперттер "Ислам мамлекети" террордук уюмуна согушкерлерди "жиберген" мамлекеттерди Ирак менен Сирияда согушуп жүрүп мекенине кайткан жарандардан этият болууга чакырат.
Ал ортодо КР Улуттук коопсуздук мамлекеттик комитети Ирак менен Сирияда согушуп жүрүп кайта кайткан беш кыргызстандыктын кармалганын билдирген. Алар негизинен өлкө ичинде жардыруу жана диверсиялык аракеттерди жасоо үчүн жиберилген.
