БИШКЕК, 25-окт. — Sputnik. КР ИИМинин Нарындагы адистештирилген күзөт кызматынын башкы башкармалыгынын кызматкери капысынан өз кесиптешин атып алгандыгын Нарын ОИИБинин маалымат кызматынан билдиришти.
Окуя 25-октябрь күнү саат 18.15те Нарын ШИИБинин күзөт бөлүмүнүн курал сактоочу бөлмөсүндө болду. 26 жаштагы ага сержант М.Н. куралын өткөрүп жатып, капысынан милициянын старшинасы Ж.у.А. тарапка ок чыгарып алган.
"Ок жабырлануучунун төшүнө тийип, ал ошол жерден жан берди. Эки милиционер чогуу кызмат өтөчү", — деп айтылат билдирүүдө.
Кырсык болгон жерге ички иштер министринин орун басары Алмаз Орозалиев чыгып кетти.
Маалыматка караганда, өз кызматкерлерин даярдоодо мүчүлүштүк кетирген жетекчилердин иши тыкыр иликтөөгө алынып, катуу чаралар көрүлөт.
Кырсыктын чоо-жайы иликтенип жатат.
Ал эми ИИМ жетекчилиги маркумдун жакындарына көңүл айтат.
