Жекшемби күнү Ысык-Көлдүн жээгине миң адамды кучагына батырган көчмөндөрдүн амфитеатры ачылды. Анын сахнасынын артында көл көрүнүп тургандыктан артисттер суунун үстүндө жүргөндөй образ жаратат. Дем алыш күндү ошол жакка барып жакшылыктын жышаанына күбө болуп келдим. Сиз кандай эс алдыңыз?
Ушул сыяктуу эле жакшы маанайдагы кабарлар менен чектелсек гана… Тилекке каршы? жагымсыз окуялар да болуп кетти. Кечээ эртең менен Асанбай кичи районундагы "Ганбей" кафесинен өрт чыкканы туурасында маалымат тарады. Өрттүн жалыны жайылып отуруп катар тизилген ресторандарды жалмап кетти. Тилсиз жоо менен күрөшүүгө Өрт өчүрүү кызматынын 11 бригадасы тартылып, кечке жуук толугу менен өчүрүлгөн. Бир нече адамды сызга отургузган өрттүн себеби азырынча тактала элек.
Таластын Миң-Булак айылынын тургуну Айтбек Таштанбеков беш жыл мурун ооруп, үч ирет жасалган операциядан кийин коляскага отуруп калган. Ошол убакта аны кийинчерээк трактор курап чыгат деп эч ким ойлобосо керек.
90 жаштагы абышка шайтан араба тээп айыл кыдырат десе ишенесизби? Эгер мага ишенгиңиз келбесе бул жактагы видеодон көрүңүз.
Жалал-Абаддагы Барпы театрынын актеру Адыл Абдибахитов 36 жылдан бери театрда иштеп болгону 5500 сом айлык алат. Мунун себеби эмнеде?
Милициянын жолдогу эң "сүйүктүү" адамдарынын кандай учурда жаны кашаярын билип көрдүк. А сиздин жиниңиз кандай учурда кайнап кетет?
Валюта наркы. Сомдун баасы долларга карата орто эсеп менен 68.29 (сатып алуу) жана 68.60 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 41.90 сом, АИ-92 үлгүсүндөгүсү 39.40 сом, ал эми дизель майы 37.50 сомдон сатылууда.
Соңку сөз. Кудай күтүлбөгөн кырсык, карандай дооматтан сактасын!
Эсендигиңизди тилеп Эламан Карымшаков
