БИШКЕК, 18-окт. — Sputnik. Казакстандын президенти Нурсултан Назарбаев тууралуу сүйлөп жатып катуу кетип калдым окшойт. Бул тууралуу өлкө башчы Алмазбек Атамбаев президенттик стипендияларды тапшырып жатып билдирди.
Кыргызстан өз продукциясын эскпорттой турган башка жолдор табыла турганын айткан Атамбаев коңшу мамлекеттер менен таттуу мамиледе жашоо зарылдыгын белгиледи.
"Казак президентинин дарегине туура эмес сөздөрдү айтып алдым окшойт. Бул тууралуу көп ойлондум. Казакстандын башчысы өз айланасына ишенет, ал эми аны жалаң олигархтар курчап отурат. Назарбаев да мендей ишенчээк болсо керек", — деди Атамбаев.
Президент Казакстандын олигархтары Назарбаевден кийин жашоо кандай болоруна, эптеп байлыгын сактап калуунун жолун ойлоп жатышканын белгиледи.
Эскерте кетсек, өлкө башчы мамлекеттик сыйлык тапшыруу аземинде Казакстандын президенти Нурсултан Назарбаевге катуу сын айтып, ага Кыргызстандын ички ишине кийлигишип жатат деген кине койгон.
Ошондон кийин казак тарап кыргыз-казак чек арасындагы көзөмөлдү күчөтүп, Кыргызстандан унаа менен элдин өтүүсү кыйла кыйындаган. Ушу тапта да бир нече чакырымга созулуп, кезек күтүп турган унааларды күрүүгө болот. Ал эми чек арадан өткөн унаалар ичиндеги жер-жемиш бузулуп кетти деген жүйө менен кайра артка кайтарылган.
