БИШКЕК, 17-окт. — Sputnik. Казакстандыктар ар бир секундада Кыргызстандан товар алып жатып 9 доллар коротот. Евразиялык экономикалык комиссиянын статистикасы боюнча быйылкы жылдын 7 айында кыргызстандык ишкерлер коңшу өлкөгө 166 миллион долларлык товар сатууга үлгүргөн.
Казакстандыктар бул каражаттын көбүнө кен жана сейрек кездешчү металлдардын концентратын сатып алган — 60 миллион доллардан ашуун.
21 миллиондун тегерегиндеги акчага Казакстандын түштүк аймагынын тургундары айран, каймак, коюлтулган сүт алган. Мында 13 миллион доллар эле сыр менен быштак сатып алууга жумшаган.
Мындан тышкары, баурдастар Кыргызстанда өстүрүлгөн жашылчага да суктанып келишет. Пияз менен чеснокко эле казакстандык кожейкелер 3 миллион доллардан көп акча сарптаса, картошкага 2,4 миллион доллар корогон.
Казакстандыктар гилас, алма, дарбыз менен өрүктү да жакшы жешет. Кыргызстандан барган кургатылган жемиштер да дүкөндөн көпкө калбайт, мейиз менен кургатылган данеги жок өрүк 3 миллион долларга айланган.
Казакстанга 3,5 миллион долларга жылкы менен эшек сатылган. Демек чек арадан үч миң баш мал өтүп, анын ар бири 1200 долларга бааланган.
Коңшу өлкөнүн дасторконунан да Кыргызстанда жасалган суусундуктар көп кездешет. Миллиондон ашуун долларга сатып алынган газдалган суулардан тарта 400 миңдин айланасындагы шараптар жайнайт.
Ал эми бөбөктөр Кыргызстандан чыккан балмуздактан кыя өтпөйт. Жети айдын аралыгында бул шириндикке Казакстан 2,5 миллион доллар сарптаган. Нан жана ундан жасалган башка азыктар үчүн 3,8 миллион доллар корогон.
Казакстандыктар made in KG бренди менен тигилген кийим-кечени да кийишет. Кыргызстандык уздардын колунан чыккан блуза, жемпир, майка, жада калса ич кийимдер да кеңири колдонулат. Мисалы, жыл башынан берки 7 айдын ичинде чек арадан эркектердин 60 миң ич кийими өткөн.
Кыргыз-казак чек арасындагы абал 10-октябрдан тарта курчуй баштаган. Казак тарап көзөмөлдү күчөтүп, унаалар менен адамдардын өтүүсү кыйла кыйындаган.
