БИШКЕК, 17-окт. — Sputnik. Борбор калаада тез жардам кызматынын унаасы жол кырсыгына кабылды. Бул тууралуу Sputnik Кыргызстан агенттигине күбө билдирди.
Анын айтымында, жол кырсыгы бүгүн болжол менен саат 14.00дө Лев Толстой көчөсү менен Жаш Гвардия преспектисинин кесилишкен аймагында болгон.
"Тез жардам унаа тыгындан өтүүгө аракет кылып атайын сигналын иштетип каршы тилкеге чыккан. Аны өткөрбөй койгондуктан Nissan унаасы менен кагышкан", — деди күбө.
Бишкек ШИИБдин Кайгуул милиция башкармалыгы бул маалыматты текшерип жатат.
Ал эми Тез жардам кызматы аталган дарекке чакыруу түшкөнүн ырастап, жаракат алгандар дарыгерлер барганга чейин ооруканага жеткирилгенин билдирди.
