БИШКЕК, 19-сен. — Sputnik. Ашхабадда өтүп жаткан жабык имараттагы V Азия оюндарында кыз-келиндер арасындагы түркмөн күрөшү боюнча күч сынашкан кыргызстандык Назира Марсбек кызы менен Мээрим Жуманазарова күмүш медалга ээ болду. Бул тууралуу оюндардын расмий сайтына жарыяланды.
Мээрим Жуманазарова 70 килограмм салмак категориясында пакистандык атаандашын жеңип жарым финалга чыккан. Анда түркмөнстандык спорчу менен кез келип аны да утуп алган. Финалдык беттеште жергиликтүү спортчу Насиба Суркиевага утулуп, жеңилүү ызасын тартты.
Белгилей кетсек, ушуну менен Кыргызстандын байге куржунунда 8 медаль болду. Буга чейин жиу-житсу боюнча Абдурахманхаджи Муртазалиев алтын, Ариет Бекишев коло медаль уткан. Андан кийин түркмөн күрөшүнө түшкөн балбандар Эсенбек Кудайбердиев күмүш, Алибай кызы Уулкан, Назира Арзыбекова жана Кененбек Шамшидин уулу коло медалдарга татышкан.
