БИШКЕК, 18-сен. — Sputnik. Кыргызстандык мушкер Абдурахманхаджи Муртазалиев Ашхабадда өтүп жаткан жабык имараттагы V Азия оюндарында жиу-житсу боюнча алтын медалга ээ болгону тууралуу кабар иш-чаранын расмий сайтына жарыяланды.
Беттеш бүгүн 18-сентябрь күнү өттү. Муртазалиев 85 килограммга чейинки салмак категориясында ат салышкан.
Маалыматка ылайык, спортчу алгач казакстандык Андрей Гаврилюкту жеңип, андан соң чейрек финалда иорданиялык Хайдар Хайтхам Абделкари Аль-Рашидден мыкты экенин далилдей алды.
Ал эми чечүүчү таймашта кыргызстандык мушкер арабиялык атаандашы Халфан Хумаид Балхол менен беттешип, натыйжада алтын медаль тагынды.
Муртазалиевдин байгеси Кыргызстандын эсебиндеги алгачкы алтын медаль. Ага чейин биринчилерден болуп жиу-житсу боюнча мелдешкен Ариет Бекишев коло медаль алган. Андан кийин түркмөн күрөшүнө түшкөн балбандар Эсенбек Кудайбердиев күмүш, Алибай кызы Уулкан, Назира Арзыбекова жана Кененбек Шамшидин уулу коло медалдарга татышкан.
Эскерте кетсек, оюндар 27-сентябрга чейин уланат.
