БИШКЕК, 12-сен. — Sputnik. Буга Жалал-Абад облусунун Өзбекстан менен чектешкен аймагындагы 725 чакырым жер тактала элек болсо, бүгүнкү күнү 643 чакырым жер такталып, эки тараптуу сүйлөшүүлөр жүргүзүлдү. Бул тууралуу өкмөттүн Жалал-Абад облусундагы өкүлүнүн орун басары Мамасалы Акматов кабарлады.
Маалыматка ылайык, Жалал-Абад облусунун алты району менен Өзбекстандын үч району чектешет.
"Азыр Сузак, Базар-Коргон райондору боюнча талаштуу аймактар толук чечилди. Ноокен районунда бир эле тилке калды. Ал эми Аксы районунда Үңкүр-Тоо жана Ала-Букада Гава, Көк-Серек участкалары сыяктуу биз ала турган жерлер бар. Жалал-Абад облусунан жалпы 643 чакырым такталып бүтсө, тактала турган дагы 81 чакырым жер калды. Калган аймактар боюнча дагы сүйлөшүүлөр жүрөт", — деди Акматов.
Эске салсак 6-7-сентябрда Өзбекстан президентти Кыргызстанга эки күндүк иш сапары менен келген. Анда өлкө башчылары чек ара маселелерин чечүүгө байланыштуу бир катар маселелерге кол коюшкан. Жума соңунда болсо Оштогу "Достук" бекети ачылган.
