Кыргыз-өзбек мамилелеринин кайрадан жанданышынан, чек арадагы "Достук" көзөмөл өткөрүү жайынын жеңилдетилген шартта иштешинен улам 5-сентябрды кыргыз-өзбек элинин достук күнү деп атоону пландап жатабыз. Бул туурасында Ош шаарынын мэри Айтмамат Кадырбаев билдирди.
"Эки эл үчүн чоң майрам, тарыхый күн болууда. Эки президенттерибиздин туура жүргүзгөн саясатынан кыргыз-өзбек мамилеси кайрадан жанданды. Биз коллегаларыбыз, өзбек тарап менен сүйлөшүп 5-сентябрды кыргыз-өзбек элинин достук күнү деп белгилөөнү мамлекет башчыларга сунуштайлы деп жатабыз", — деди Айтмаматов.
Эске сала кетсек, Өзбекстан президенти Шавкат Мирзиёев 5-6-сентябрда Бишкекке мамлекеттик иш сапар менен келип, анда эки тараптуу бир нече документтерге кол коюлган. Негизги маселе катары кыргыз-өзбек мамлекеттик чек арасы боюнча жетишилген макулдашуусу болгон.
"Кыргызстан менен Өзбекстандын президенттери чек ара боюнча бир нече документтерге кол койду. Андан сырткары, Ош менен Анжиян шаарлары соода-экономикалык, маданий-гуманитардык мамиле келишимине кол койдук. Мындан ары эки шаар эмес, эки мамлекеттин достугуна жаңы кадамдар жасалып, чек ара боюнча мурдагы көйгөйлөр болбойт деп ишенебиз", — деди мэр.
2010-жылдан тарта бүгүнкү күнгө чейин аталган жай күндүн кайсы бир гана маалында иштеп, чек араны кесип өтүү үчүн бир катар документтер, атайын чакыруу же телефонограмма тыкыр талап кылынып келген.
