ОШ, 7-сен. — Sputnik. Алай районунун Сары-Таш айылында тоют жүктөп баратып эки турист менен кошо жергиликтүү тургунду коюп, изин жашырып кеткен айдоочу кармалды. Бул тууралуу Ош облустук Кайгуул милиция бөлүмүнүн маалымат катчысы Айбек Бечелов аймактык кабарчыга билдирди.
Анын айтымында, Hyunday Porter унаасынын ээси Алайдын Чий-Талаа айылынын 27 жаштагы тургуну экендиги аныкталган.
"Айдоочунун унаасы айып короого киргизилди. Учурда ага карата кылмыш ишин козгоо же козгобоо боюнча иликтөө иштери жүрүп жатат. Ал унаасы менен туристтерди коюп кеткендигин байкабагандыгын айтууда", — деди Бечелов.
Эске сала кетсек, үстүбүздөгү жылдын 4-сентябрына караган түнү Сары-Таш айылында тоют жүктөп бараткан унаанын айдоочусу 24 жаштагы Германиянын жараны Заец Камил Махмуд, 23 жаштагы Кеник Бауэр Кобинаин жана жергиликтүү жашоочу Ибраимовду коюп кеткен. Кырсыкка кабылгандар жеңил жараат алган.
