БИШКЕК, 31-авг. — Sputnik. Казакстандын Караганда облусундагы шахтада метандын жарылышынан үч адам каза болуп, дагы үч киши жаракат алганын Sputnik Казакстан агенттиги маалымдады.
Билдирүүгө ылайык, окуя 31-август таңкы саат 04:21лер чамасында катталган.
"Авария болгон учурда шахтада 136 адам болуп, үчөө жарылуунун очогунда иштеп жаткан. Саат 05:35 чамаларында шахтадагы жумушчулардын бири ошол үч адамдын сөөгүн тапкан. Маалыматка ылайык, кырсыктан көз жумгандар 37, 34 жана 31 жаштагылар. Маркумдардын баарынын тең үй-бүлөсү, бала-чакасы болгон", — деп жазылат маалыматта.
Ал эми жабыркаган 47, 53 жана 21 жаштагы үч адам дароо ооруканага жаткырылган. Дарыгерлердин айтымында, учурда алардын абалы туруктуу, акыл-эси ордунда. Ошондой эле алар ооруканага метанга уулангандар да кайрылып, аларга тийиштүү медициналык жардам көрсөтүлүп жатканын кошумчалап кетишкен.
