БИШКЕК, 28-авг. — Sputnik. UFC чемпиону Конор Макгрегор менен болгон беттештин ар бир секундасында Флойд Мэйвезер 178 миң 41 доллар пайда көрдү. Бул тууралуу mashable порталы жазып чыкты.
Эки чемпиондун беттеши Лас-Вегаста өтүп, Флойд 10-раундда жеңишке жетишкен.
Беттешке чыкканы үчүн эле Флойд 100 миллион, Конор 30 миллион алган. Ал эми мындан сырткары трансляциядан, жарнамадан жана билеттерден дагы үлүштөр түшкөн. Беттешке чейин эле Флойд 300 миллион доллар пайда көрөрүн айткан эле.
"Мушкерлердин беттеши 28 мүнөт 5 секундга созулду. Бул 1685 секунд. Ошентип Флойд секундасына 178 миң 41 доллар таап жатты. Бул боксчунун Мэнни Пакьяо менен беттеш учурунда тапкан кирешесинен эки эсе көп дегенди түшүндүрөт. Ал беттеште Мэйвезер секундасына 63 миң доллар таап турган", — деп жазат портал.
Конор бул кармаш учурунда UFC турнириндеги бардык беттештеринен түшкөн акчадан көп киреше тапкан.
