Бишкектеги Спорт сарайдын жанынан террорчу болушу мүмкүн делгендер кармалды

БИШКЕК, 28-авг. — Sputnik. Улуттук коопсуздук мамлекеттик комитетинин кызматкерлери Бишкектин чок ортосунан террорчу болушу мүмкүн делген адамдарды кармады. Бул тууралуу Sputnik Кыргызстан агенттигине УКМКнын маалымат кызматы билдирди.

Шектүүлөр 28-августта күндүзү Кожомкул атындагы спорт сарайынын жанынан колго түшүрүлгөн.

Маалыматта канча адам кармалганы жана алар эмнеге шектелип жатканы айтылган эмес.

"Террорчулукка каршы күрөшүү боюнча жүргүзүлгөн операцияда шектүү жарандар кармалды. Толук маалымат кийинчерээк берилет", — деп айтылат билдирүүдө.

Айрым жергиликтүү ЖМКлар кармалгандар Көк-Жар конушунда милиция кызматкерин граната менен жардырабыз деп коркуткан террорчулар экенин жазып жатышат.

Эскерте кетсек, 24-августтун түнүндө Кайгуул милициясы документтерди текшерүү үчүн Ауэзов көчөсүнөн мамлекеттик номери S 8191 AG болгон Nissan Presage үлгүсүндөгү машинаны токтоткон. Анын ичинде төрт киши отурган. Жүргүнчүнүн бири тапанча алып чыгып, милиция кызматкеринин башына такаса, экинчиси граната алып чыгып "жардырам" деп коркуткан. Мындан улам укук коргоо органдарынын өкүлдөрү аларды коё берүүгө аргасыз болуп, кылмышкерлер из жашырып кетишкен.

Кийин "Перехват" планы жарыяланып, шектүүлөр издөөгө алынган. Машина Көк-Жар конушундагы Кулмырзаев көчөсүнөн табылып, анын ичинен эксремисттик маанайдагы китептер жана уюлдук телефон алынган.