Кыргызстандын курама командасы Азиядагы күчтүү командалардын катарына кирүүгө аракет көрүп жатат. Бул тууралуу КРдин Футбол федерациясынын башкы катчысынын орун басары Нурдин Букуев Sputnik Кыргызстан радиосуна маек куруп жатып билдирди.
Анын айтымында, футбол боюнча Азия биринчилиги 2019-жылы Бириккен Араб эмирлигинде өтөт.
"Азия кубогуна даярдык жогорку деңгээлде жүрүп жатат. Ачыгын айтканда ушул кубоктон үмүтүбүз чоң. Анткени жолдомо алууга жакшы мүмкүнчүлүк жаралды. Биздин тайпада Индия, Мьянма дана Макао курама командалары бар. Буга чейин Макаону жеңип, Индиядан утулганбыз", — деди Букуев.
Ал кыргыз футболунун тарыхында биринчи жолу Азиядагы күчтүү командалардын катарына кирүү аракети көрүлүп жатканын кошумчалады.
Белгилей кетсек, үстүбүздөгү жылдын 5-сентябрь күнү улуттук курама команда Мьянма менен беттешет.
