БИШКЕК, 23-авг. — Sputnik. Кыргызстанда биринчи жолу дүйнө жүзүндөгү мүнүшкөрлөрдүн форуму өтөт. Бул тууралуу Салбурун федерациясы кабарлады.
Билдирүүгө ылайык, дүйнөлүк деңгээлдеги иш-чара 4-сентябрда Чолпон-Ата шаарындагы Рух-Ордо этнокоплексинде башталып, 7-сентябрда Тоң районундагы Боз салкын жайлоосунда улуттук оюндар менен жыйынтыкталат. Форумга Европа, Азия жана Перс булуңундагы 50дөй өлкөдөн 150 мүнүшкөр келет.
Анын алкагында алгыр куштарды сактоо, коргоо маселери талкууланып, бүркүт, ителги жана тайгандардын көргөзмөсү уюштурулат.
Андан сырткары, чет мамлекеттен келген жаш мүнүшкөрлөрдүн эл аралык фестивалы өтөт.
